1Ti 2 | GbrGAW | STEP | Omi ɓeda nyi n ho aba, zhin aduwa n mwa ntu azaje ɓo, gyi Shekwoyi wye wa gye ɓa sun-sun. Zhin Shekwoyi godiya ntu nya ɓo nwo ɓa zhin ɓa nyi.

1 Timothy 2

Shi Yi Ɓa zhin Aduwa Nwu

1 Omi ɓeda nyi n ho aba, zhin aduwa n mwa ntu azaje ɓo, gyi Shekwoyi wye wa gye ɓa sun-sun. Zhin Shekwoyi godiya ntu nya ɓo nwo ɓa zhin ɓa nyi.

2 Zhin aduwa ntu asu ɓo, na za yi n ɓa zhin a iko da vinya tu n yi eshe, kwo n ɓa n na tnu-tnu yakwoi shi, n na abai n yi ɓa sase n lafiyai, n bugba-fuyi, ya se ase manayi yi zhin nubo n Dagayi ɓo. 3 Deye bmiya lo, kwoi da eyi Dagayi bugba. 4 Gama wo ye aza vinya ɓa pwo, ɓa bwa gaiciya ye awyega. 5 Nge Shekwoyi gni n sepa gmanyi, aza vinya zhin n sepa gmanyi, n Kristi Yesu n wohin tukwo zanyikwoci n dna n ɓa tasin wa ɓe n bai n na aba gmanyi.

6 Wa gawo wye-wyeyi ntu n na aza ɓo vinya. Ɓeda nyi n Shekwoyi wa tnu n cei dna n esa manayi n na lanyi. 7 Ai la mi kni gaiciya nu n mi da-ma zhin tnu-tnuyi n nabari da yi, Shekwoyi nya, ma wu gaiciya ye n na abyedo aba, ma wuɓa Shekwoyi shiri gni-gni nya dna n gaiciya ga. 8 Ntu cenu miye aza vinya ɓa zhin aduwa ɓai ku abwa a gyi-gyi-yi wu Shekwoyi n tna laifi, ntna minagyi, ntna nuwun. 9 – 10 Anyikwoza ce ɓaku ze lo nu, ɓaku ce pi ɓa zhin ɓo kwo bmiya, ɓai pa aje cewo. A Yesu-viyi anyikwo a kpeɓaye ntu n ɓa ɓemana zhin ɓo, to n zokwo shiɓa zhin ɓahin aba, kwo tukwo knin, kwo anya shi-shi, kwo aje anakwoyin. 11 Anyikwoza, ɓa kna tnubua ɓa tumwi peceiye n tukwo gbayi.

12 Mita ye anyikwoza ɓa wunya kwo ɓa ze a tukwoda n na azanugbai tukwon. Ɓaku cepi n na aduwa nyakun n yezhi sa. 13 Ntu kniɓei ya? Ntuge Shekwoyi ɓei zhin Adamu nu nabye wa kma Hawawu zhin. 14 Shetan to ɓei dna Adamu nu kwocen, ama Hawawu nu, laifi kwa ɓe. 15 Ntu cenu Shekwoyi wa tnu anyikwoza n na azhinyi, esa n ɓa ma aɓi n cei, ama woɓa gniɓa wyewyeyi ɓai ya kpema wo, ɓai se ase pi-pi-pi, n bmiya ɓai ye n na azai.